Revelation of John 5
tavú úmakaan-kwandaaigona kwaasái.
1mirá suwaꞋá awánaawanda kawááin-avaraꞋa máyowai ayáánúrapaꞋa tavú úmakaan-kwandaaima évarevar-ayampaꞋa aúvái kwáyon-kwandaaima tokéna íma awánaigwae séna avakaeté-sanomba minkwándááíráꞋá tásuwena tokówaꞋa 2kwíyómpaken-kwayoꞋnaꞋa asirayáwáímbá awánaawanana anónkaꞋa séna nááwa kawenár-úramba kanaán-umaiya máyaindawaiya misánómbá tátuwena arírámai awánaniyo súwana 3kwíyómpakewai marapákéwáí kwaántái marupákéwáí amáparawai misánómbó tátuwesamo awánáíyamba uwóvíꞋa ónááowe. 4kaweꞋá umái mésa misánómbá íma tátuwai-kwaasi máyóntavai póꞋa iviꞋá táma-tamaꞋa ówána 5minánón-kwáásívínkémbá moóráwai simásimena séna iviꞋá táánavo awánaao. moóráwai Yútaa-andarakewai usáyaaitaraiwai Tévíti aísaavutantambo uráiwai sáwí-yantaakomba usáyaaitaraimba póna kanaán-umai misánómbá tátuwena minkwándááímá ariráníye siráiye.6súwaꞋa awánaawanda minéíyáímbó túvamaimo máyówaiye minánón-kwáásíyé kawááin-avaraꞋa úkúmaresa máyówana moóráwai sipisípi-araakaawai kawááin-avaraꞋa ména tuvúwúwana puwéna usásinkaiwairaamba ména aꞋnómpínkémbá avakaeté-awaayaamba kwáyowana avakaeté-auramba kwáyowana mináúránkóná ááimba Áánútun-amanko avakaeté-asirayan-amamba uráisana Áánútu kwembá aiꞋmáráísana amápaꞋ-maravaꞋa kunkwénaaiye. 7misípísípí-áráákaawai kentáásí sáwí-meyamba mairáiwai téna kawááin-avaraꞋa máyowai ayáánúrapakemba tavú úmakaan-kwandaaima mairéna 8minéíyáímbó túvamaimo máyówaiye moórá-kwaai aíyayaan-umai éíyain-anon-kwaasiye sipisípi-araakaawai aísamaivimba kívairesa uwíremba tátokesa óntanko áwíꞋa kóri-ontandei úmakaan-taaveꞋa tátorowana mimpímbá áséi-kwiyumba ún-kanama kwáyowana minkánáóná ááimba Áánútuna kwaási kwempáꞋó námúnaamo kwésemba mináséí-kwíyúmbá kwéisaintemba námúnaamo sembá kwéisaiye. 9aúná-ima maarán-ímá sésa
- embá tuvúwówa puwéma usásinkaanda mindáyavai sáwíꞋo umáímo máyáampinkemba tíꞋmai Áánútundei-iꞋa umátínkaraane. amápar-akun-andavinkemba évakarawai kwétire óꞋon-oꞋon-aimbo kwésen-kwaasivinkemba évakarawai kwétire óꞋon-oꞋon-kuwara-kwaasivinkemba évakarawai kwétire amápaꞋ-maravakemba évakarawai kwétire mirá kwéondayavai kawenár-úramba po kanaán-umai misánómbá tátuwe kwandaaimá ariráníyone.
- sipisípi-araakaawaimba tuvúwówana puwéna usásinkaiwai kawenár-úramban-iye. mindáyavena póna kwená asirayánkó kwaíkwaiꞋa isaná kawe-tántááꞋá máráísana kwená kawer-ímáyáágó kwaíkwaiꞋa isaná kwaásiraꞋa kawáá úmae kwéiyisana kwenáwíꞋa anómba isaná kwená óꞋoran-aaimba kwaíkwaiꞋa isatá kwenáwíta mósá kwémaraumne
13minkákémbá kwíyómpakewaiye marapákéwáíyé kwaántái marupákéwáíyé uwí-nómpínkéwáíyé maarán-ímá sésa
- kawááin-avaraꞋa máyáiwaine sipisípi-araakaawai kentáásí sáwí-meyambo mairáiwaine túwíꞋa mósá maréta túwíꞋa anómban-iye kwésunanaya kentí
- óꞋoran-aaimba kwaíkwaiꞋa ínana kentí
- asirayámbá kwaíkwaiꞋa íníye
Copyright information for
KZE